İngiltərə hökuməti gələcək nəsilləri siqaretin zərərlərindən qorumaq üçün qanunlar çıxaracaqlarını və hər il siqaret alma yaşını artırmağı planlaşdırdıqlarını bildirib.
Aztibb.az “TRT Haber”ə istinadən xəbər verir ki, parlamentdə bu məsələ ilə bağlı səsvermənin “sərbəst səsvermə” olacağı açıqlanıb.
Baş nazir R.Sunak çıxışında gənclərə siqaret satışının qadağan edilməsi ilə bağlı qanunun İngiltərə parlamentində səsverməyə çıxarılacağını qeyd edərək, siqaret alma yaşının hər növbəti ildə bir il artırılacağını vurğulayıb.
"Bu qanun o deməkdir ki, siqaret heç vaxt qanuni olaraq bu gün 14 yaşlı bir gəncə satılmayacaq və onlar və onların nəsilləri siqaretsiz böyüyə bilər".
Hökumət elektron siqaretlərin istifadəsi ilə bağlı da açıqlama verib: "Uşaqlarımızın elektron siqaretə çıxışını məhdudlaşdırmaq üçün tədbirlər görəcəyik. Gələcək nəslin sağlamlığının müdafiəsi üçün doğru addımlar atılmalıdır”.
