Britaniyalı tədqiqatçılar aşkar ediblər ki, məşhur arıqladan dərmanlar ciddi yan təsirlərə səbəb ola bilər. Ozempic, Vegovi və peptid hormonlarının fəaliyyətinə təsir edən digər dərmanlar mədə-bağırsaq xəstəlikləri riskini artırır.

Aztibb.az xəbər verir ki, bu barədə “HealthNews” portalı məlumat yayıb.

Alimlər müxtəlif dərmanlar qəbul edən xəstələrdə mədə-bağırsaq xəstəliklərinin tezliyini müqayisə ediblər.

Məlum olub ki, bu qrupa daxil olan Ozempic və digər dərmanlar pankreatitin inkişaf riskini 9,09 dəfə artırır. Bu, ürəkbulanma, qusma, qızdırma və şiddətli qarın ağrısına səbəb ola bilən mədəaltı vəzinin iltihabıdır.

Bundan əlavə, GLP-1 agonistləri ilə müalicə olunan xəstələrdə bağırsaq obstruksiyasına 4,22 dəfə daha çox rast gəlinir.

Digər gözlənilməz təsir qastroparez (mədə iflici) riskinin artması idi. Bu, mədə əzələlərinin fəaliyyətinin azalması ilə müşayiət olunan həzm pozğunluğudur və qidanın nazik bağırsağa keçməsini çətinləşdirir.

Tədqiqat müəllifləri arıqlamaq istəyən insanları yan təsirlərin ehtimalını nəzərə almağa və dərmanları məsuliyyətlə seçməyə çağırır.