Sankt-Peterburq Politexnik Universitetinin mətbuat xidməti açıqlayıb ki, tədqiqatçılar sinir liflərinin böyüməsini stimullaşdıran bioloji parçalana bilən protezlər hazırlayıblar.

Aztibb.az TASS-a istinadən xəbər verir ki, universitetin alimləri digər universitetlərdən olan həmkarları ilə birlikdə ilk dəfə periferik sinir liflərindəki qüsurların dəyişdirilməsi üsulunu işləyib hazırlayıblar.

Qeyd edilib ki, bu artıq heyvanlar üzərində uğurla sınaqdan keçirilib.

Həmçinin bildirilib ki, analoji əməliyyatlar artıq xaricdə aparılıb, lakin xarici alimlər tədqiqat zamanı avtonevral əlavələrdən - yəni bədənin digər hissələrindən götürülən insan sinirlərindən istifadə ediblər.

Bu metodun dezavantajı ondan ibarətdir ki, belə əməliyyatlar zamanı 3 sm-dən çox olmayan qüsuru əvəz etmək mümkündür, yeni texnologiya isə sinirin daha böyük uzunluqda bərpasına imkan verir.

Heyvanlar üzərində aparılan təcrübələr göstərib ki, yeni yaranan sinirlər lifləri olan kanal borusu vasitəsilə böyüyür və bu, sinir sistemi zədələndikdən sonra ətrafların hərəkət fəaliyyətini bərpa etməyə imkan verir.

"Həm kanalın əldə edildiyi polilaktid, həm də liflərin alındığı xitozan rezorbsiya olunan biouyğun polimerlərdir. Buna görə də orqanizmdən bu materiallara kəskin iltihablı reaksiya müşahidə olunmayıb", - açıqlamada deyilib.