Rusiyalı mütəxəssislər laboratoriya şəraitində bədxassəli prostat şişinin modelini yetişdirib və onun üzərində şiş əleyhinə dərmanlardan birini sınaqdan keçiriblər.

Aztibb.az xəbər verir ki, bu barədə TASS agentliyi yazıb.

"Son illərdə orqanoidlərlə - şişlərdən hazırlanmış üçölçülü hüceyrə kulturaları ilə iş geniş vüsət alıb. Tədqiqatçılar prostat şişlərindən orqanoidlər yetişdirib və onların prostat xərçənginin müalicəsində istifadə edilən dərmanlardan biri olan “Docetaxel”ə necə reaksiya verdiyini sınaqdan keçiriblər.

Test nəticələri göstərib ki, ki, dərman praktiki olaraq şiş hüceyrələrinin canlılığını azaltmır”, - hesabatda bildirilib.

Bu cür tədqiqatlarda mənfi nəticələr də dəyərlidir, çünki onlar səmərəsiz dərmanları istisna edir və effektiv müalicə üsullarının axtarışını asanlaşdırır.

"Biz prostat xərçənginin modelini uğurla əldə edə bildik və onun üzərində dərmanın effektivliyini sınaqdan keçirə bildik. Materialın toplandığı andan nəticələrin əldə edildiyi ana qədər bir aydan az vaxt keçdi”, - tədqiqatın müəlliflərindən biri Sergey Nikulin bildirib.

Alimin fikrincə, yeni texnologiyanı uğurla tətbiq etmək üçün əlavə tədqiqatlar aparmaq lazımdır: nəticələri laboratoriyada və xəstələrdə müqayisə etmək, həmçinin onu sadələşdirmək və maya dəyərini azaltmaq üçün məhsul yetişdirmə prosesini təkmilləşdirmək lazımdır.