Su məkanları (göllər, çaylar) insanın psixi sağlamlığına və rifahına müsbət təsir göstərir. Belə yerlərdə vaxt keçirməyin bir yolu balıq tutmaqdır. Hobbinin populyarlığına baxmayaraq, onun psixi sağlamlıqla əlaqəsi ilə bağlı elmi araşdırmalar məhduddur.

Aztibb.az “MDPI Epidemiologia” portalına istinadən yazır ki, Ulster Universitetində, Belfast Kraliça Universitetində və digərlərində (bütün Böyük Britaniya) həyata keçirilən araşdırma, istirahət məqsədi ilə balıq ovun yetkin kişi balıqçıların psixi sağlamlığına necə təsir etdiyini öyrənməyə çalışıb.

Tədqiqat çərçivəsində 1752 iştirakçı arasında sorğu keçirilib. Onlar öz xüsusiyyətləri, istirahət məqsədli balıqçılıqda iştirakları, fiziki aktivlik səviyyəsi və psixi sağlamlıqları ilə bağlı sualları cavablandırıblar.

Nəticələr daha tez-tez və daha uzun müddət balıq tutan iştirakçılarda az balıq tutanlarla müqayisədə depressiya, narahatlıq, şizofreniya, intihar düşüncəsi və aqressiv davranış kimi psixi sağlamlıq problemlərinin daha az olduğunu göstərib.

Bu nəticələr sübut edir ki, balıq tutmağa vaxt sərf etmək istirahəti təşviq edə və psixi sağlamlığı yaxşılaşdıra bilər. Psixi sağlamlıq problemi olan insanlarda fiziki aktivliyi də təşviq edə bilər. Bu tapıntılar sağlamlıq proqramları və siyasətlərinin hazırlanması üçün faydalıdır.