Avropa Ətraf Mühit Agentliyi (EEA) bildirib ki, qida qablaşdırmasında istifadə edilən hormonu pozan kimyəvi maddə olan Bisfenol A (BPA) demək olar ki, bütün insanların orqanizmində mövcuddur və potensial sağlamlıq riski yaradır.

Aztibb.az medicalinsider.ru-ya istinadən xəbər verir ki, Bisfenol A fenol qrupuna aid olan üzvi birləşmədir. Dünyada ildə 2,7 milyard kiloqram istehsal edilən bu maddə bəzən antioksidant kimi də istifadə olunur.

Bisfenol A plastik kütləyə bərkidici kimi qatılır. Bu maddə suda zəif həll olunsa da, çənlərdə uzun müddət qaldıqda suya diffuziya edə bilir və insan orqanizmi üçün təhlükə yaradır.

ABŞ-ın Milli Toksikoloji Proqramının ekspertlərinin illər öncə keçirdikləri təcrübənin nəticələrinə əsasən, həmin maddə bir sıra xəstəliklərə, o cümlədən prostat və süd vəzi xərçənginin inkişafına yol açır.

Hazırda dünyanın bir çox ölkəsində plastik qabların və polietilen torbaların istifadəsinə məhdudiyyətlər qoyulub. Onlardan istifadənin azaldılması istiqamətində bir sıra tədbirlər görülür.