Ərzurumda Atatürk Universiteti alimləri yataq xəstələrində şəkər, yanıq, yataq yaraları üçün bitki mənşəli dərman hazırlayıblar. Könüllü xəstələr üzərində sınaqlarından uğurlu nəticə alan kremi satışa çıxarmağı planlaşdıran alimlər bununla bağlı müvafiq dövlət qurumlarından dəstək gözləyirlər.

Aztibb.az “Haberturk” saytına istinadən xəbər verir ki, professor Murat Çelik və köməkçisi Ufuk Atmaca yara sağaldan krem hazırlamaq üçün təxminən 14 il əvvəl işləməyə başlayıblar.

Hər iki alim ədəbiyyatda bilinən bir molekulun bioaktiv olduğunu və bu birləşmənin kimyəvi üsullarla sintezinin baha başa gəldiyi bilirdi. Bu məqsədlə onlar professor Özlem Barışdan dəstək istəyirlər.

Özlem Barış müxtəlif göbələklər üzərində təcrübələr aparırdı. Alim göbələkdən istifadə edərək hazırlanacaq dərman üçün istənilən birləşməni sintez edir.

Hər üç alimin MC9 adını verdikləri göbələkdən istifadə edərək molekulu istifadəyə yararlı hala gətirmək üzərində çalışmaları 3 il çəkir. Araşdırmaların sonunda hazırlanan dərman Atatürk Universitetinin laboratoriyasında siçanlar üzərində sınaqdan keçirilir. Kremin yanıq və zədə testlərində faydalı olduğu müəyyən edilir.

Siçanlarda kremin müalicəvi gücü aşkar edildikdən sonra könüllü xəstələr üzərində araşdırma aparılır.

Şəkər xəstələrinə şəfa

Toxuma və dərinin bərpasında müvəffəqiyyətli olan krem, Diyarbəkir Dəclə Universiteti Araşdırma Xəstəxanasında şəkərli diabet xəstələrinə tətbiq edilir. Eyni zamanda Atatürk Universitetinin Araşdırma Xəstəxanası Plastik və Rekonstruktiv Cərrahiyyə Kilinkasının könüllü xəstələri üzərində də sınaqlar başlayır.

Hətta şəkərli diabet xəstələrindən biri diabet yaralarının təxminən 1 ay ərzində sağalması ilə amputasiyadan xilas olur, Qanında şəkəri 400 olan digər xəstənin yarası da qısa müddətdə sağalır. Krem həmçinin yataq xəstəsi olan yaşlı xəstənin bədənindəki yaraları tezliklə sağaldır.

Dabaq xəstəsi olan heyvanlara müsbət təsirləri oldu

Alimlərin insanlar üzərində sınaqdan keçirdikləri və uğur qazandıqları kremin müalicəvi təsiri heyvanlar üzərində də yoxlanılır.

Dabaq xəstəliyindən əziyyət çəkən 19 baş iribuynuzlu mal-qaraya vurulan vazelinlə qarışdırılmış həmin krem qısa müddətdə müsbət təsir edir.

14 il davam etdi

Ümumilikdə tədqiqatlar təxminən 14 il davam edib.

"Professor Özlem Barışın apardığı araşdırmalar nəticəsində bir növ göbələkdən istifadə edə biləcəyimizi müəyyən etdik. Hətta göbələyin adını MC9 qoyduq. Kremin göbələklə hazırlana bilməsi işimizi bir az da asanlaşdırdı. Əldə etdiyimiz kremin effektivliyinin qat-qat yaxşı olduğunu gördük... Biz müəyyən etdik ki, krem lazımi müalicəni təmin edir. Dərmanın təsirli olması üçün onun suda həllolma qabiliyyəti yüksək olmalıdır”, - deyə professor Murat Çelik bildirib.

Krem yataq yaralarında və diabetik yaralarda istifadə edilən bir dərmandır. 100 faiz təbii bitki tərkibli steril məhsuldur. Heç bir toksik təsiri olmayan bir dərmandır. Xəstələrin qan analizində onun heç bir toksik təsirinin olmadığı da müşahidə edilib.

Dərmanı daha da inkişaf etdirmək üçün daha 1-1,5 il işlər davam edəcək.