Hindistanda xəstə boğazında problem yarandığı üçün həkimlərə müraciət edib. Onda son üç ayda boğuq səs, öskürək, faringit (boğazın iltihabı), udma çətinliyi, yorğunluq və arıqlama kimi simptomlar olub.

Aztibb.az “Science Direct”ə istinadən xəbər verir ki, ənənəvi tibbi testlər xəstəliyin səbəbini müəyyən edə bilməyib. Genetik analiz nəticəsində infeksiyaya “Chondrostereum purpureum” adlı göbələyin səbəb olduğu müəyyən edilib.

Bu, insanların bitki göbələyi ilə yoluxması ilə bağlı qeydə alınan ilk hadisədir.

Kişinin xroniki xəstəlikləri olmayıb və immun sistemini zəiflədən dərmanlar qəbul etməyib. Göbələklər və bitkilərlə bağlı elmi tədqiqatlarla məşğul olan fitomikologiya sahəsində mütəxəssislərin bildirdiyinə görə, yoluxma çox güman ki, onun bu cür infeksiyaya qarşı daha həssas olmasından irəli gəlib. Müalicə irin drenajını və iki aylıq dərman kursunu əhatə edib.

Həmin göbələk ağaclarda və digər bitkilərdə xəstəlik törətmək qabiliyyəti ilə tanınan bir göbələkdir. Dünyanın müxtəlif yerlərində yayılmışdır və həm yabanı, həm də mədəni bitkilərdə tapıla bilər. Bu göbələyin infeksiyasına nəzarət etmək üçün tez-tez kimyəvi üsullardan istifadə olunur.

Bu hal onu göstərir ki, ətraf mühitdə böyüyən bitki göbələkləri insanlarda xəstəlik törədə bilir. Nəzəri olaraq, insanın bədən temperaturunda böyüyə bilən göbələklər insanlar üçün patogen ola bilər. Onlar bədənə zədələnmiş dəri, yaxud tənəffüs yolları vasitəsilə daxil ola bilər və xüsusilə immuniteti zəif olan insanlarda infeksiyaya səbəb olur.