Frensis Krik İnstitutu antiviral dərman Molnupiravirin SARS-CoV-2 virusunun mutasiyalarının inkişafına səbəb olduğunu aşkar edib.

Aztibb.az bu barədə “Nature” jurnalının araşdırmasına istinadən yazır.

Alimlər SARS-CoV-2 virusunun mutasiya xəritəsini yaratmaq üçün dünyanın DNT məlumat bazalarını təhlil ediblər. Bunun üçün 15 milyon viral genom ardıcıllığının öyrənilməsi tələb olunurdu.

Viruslar daim mutasiyaya uğrayır, lakin alimlərin fikrincə, proseslərin tipik gedişindən fərqlənən bir sıra mutasiya hadisələri var.

Bu mutasiyaların görünüşü 2022-ci ildə Molnupiravirin tətbiqi ilə üst-üstə düşdü.

Həmçinin, spesifik mutasiyalar bu dərmanın geniş istifadə olunduğu ölkələr üçün xarakterik idi. Tədqiqatçılar həmçinin müəyyən ediblər ki, Molnupiravir ilə mutasiyaya uğramış viruslar insandan insana ötürülür, lakin onların heç biri təhlükəli variant deyil.

Tədqiqatın nəticəsi odur ki, Molnupiravir virusun genetik müxtəlifliyini artırır və yeni variantların yaranması potensialına malikdir. Alimlər belə qənaətə gəliblər ki, Molnupiravir və oxşar dərmanların ümumi fayda və risklərini qiymətləndirərkən bunu nəzərə almaq vacibdir.