26-27 sentyabr tarixlərində ölkəmizdə infodemiyaya qarşı mübarizəni dəstəkləmək məqsədilə Avropa İttifaqı (Aİ) və Ümumdünya Səhiyyə Təşkilatının (ÜST) birgə təşkilatçılığı ilə təlim təşkil olunub.
Aztibb.az xəbər verir ki, “İnfodemiyanın idarə olunması” mövzusunda təlimdə mediya və digər təşkilatlardan nümayəndələr iştirak ediblər.
Bildirilib ki, COVID-19 pandemiyası zamanında indiyə qədər görünməmiş həcmdə qərəzli informasiyalar, konspirasiya nəzəriyyələri, yanlış məlumatlar və dezinformasiyalar meydana çıxıb.
Nəticədə bu istər ictimai səhiyyə, istərsə də sosial tədbirlərin həyata keçirilməsinə öz mənfi təsirini göstərib.
Sözügedən təlim infodemiyanın idarəolunması sisteminin qurulması və saxlanılması üçün ölkə səviyyəsində bu sahə üzrə ehtiyacları qarşılamaq məqsədi daşıyıb.
Bilik və bacarıqların artırılması təlimində ÜST-nin mütəxəssisləri infodemiya anlayışı və onun yaratdığı sağlamlıq risklərinə dair mövzularda təqdimatla çıxış ediblər.
Təlimdə xüsusi vasitə və yanaşmalardan faydalanmaqla infodemiyaya qarşı mübarizə üçün lazımi tövsiyələr verilib.
İki günlük təlim Avropa İttifaqı tərəfindən maliyyələşdirilən “Vaksinasiyaya Dəstək” layihəsi və ÜST-nin Səhiyyədə Fövqəladə Hallar Proqramı çərçivəsində baş tutub.
İnfodemiya anlayışı necə prioritet oldu?
İnfodemiya COVID-19 pandemiyasının başlaması ilə əhəmiyyət kəsb edən bir anlayışdır.
Yaşadığımız informasiya əsrində COVID-19 pandemiyasının idarə olunması bütün dövlətlərin diqqət mərkəzindədir.
Ümumdünya Səhiyyə Təşkilatının (ÜST) bu prosesdə tərtib etdiyi yol xəritəsi əsasən, infodemik idarə, koordinasiya və idarəetmə, sübutların müəyyən edilməsi və elm biliklərin əlçatan olması kimi amillərə əsaslanır.
ÜST rəhbərliyi 2020-ci ildəki açıqlamasında “biz təkcə pandemiya ilə deyil, həm də infodemiya ilə mübarizə aparırıq” bəyanatını vermişdi.
COVID-19 pandemiyası başlayan zamandan etibarən infodemiya qlobal səviyyədə yenidən gündəmə gələn bir anlayışa çevrildi.
COVID-19 haqqında informasiyanın həddindən artıq yüklənməsi ilə istər-istəməz yaranan qeyri-real, qeyri-dəqiq və etibarsız məlumat "yanlış məlumat epidemiyası”nı gətirdi.
Hər bir məlumat alan üçün belə bir vəziyyətlə qarşlaşma panika və qorxuya səbəb ola, həmçinin xəstəliklə mübarizəni çətinləşdirə bilər.
Ümumiyyətlə yoluxucu xəstəliklər epidemiya halını aldıqda cəmiyyətdə sürətlə qeyri-müəyyənlik və panikaya səbəb olur.
Epidemiyaları əhatə edən ssenarilərdə dezinformasiyanı mümkün qədər tez aradan qaldırmaq ehtiyacı yaranır ki, əks halda bu qeyri-müəyyənlik daha dağıdıcı ola bilər.
İnfodemiyanı xüsusi müalicəsi, peyvəndi olmayan və asanlıqla yayılan yoluxucu bir xəstəliklə müqayisə etmək olar.