Avstraliya Milli Universitetinin alimləri Alzheimer xəstəliyinin erkən diaqnostikası üçün üsul hazırlayıblar.
Aztibb.az “MIR 24”ə istinadən xəbər verir ki, metod xəstəliyin ilk əlamətləri görünməzdən çox əvvəl onun riskini proqnozlaşdırmağa və sağlamlığı qorumaq üçün profilaktik tədbirlər görməyə imkan verir.
Xəstəliklərin erkən aşkarlanması sağlamlığın qorunmasında əsas amillərdən biri hesab olunur. Bir şəxs xəstəliyə meyli haqqında məlumatı nə qədər tez alırsa, onun inkişafının qarşısını almaq şansı bir o qədər çox olur.
Alimlər nanotexnologiya, süni intellekt və molekulyar biologiya kimi müxtəlif texnologiyaları birləşdirərək, ilk klinik təzahürlərin görünməsindən iyirmi il əvvəl Alzheimer xəstəliyinin inkişaf ehtimalını proqnozlaşdıra bilən sadə bir test yaradıblar.
Hal-hazırda Alzheimer diaqnozu ciddi klinik tədqiqat və xüsusi avadanlıq tələb edən psixi pozğunluqların təhlilinə əsaslanır. Bəzən belə prosedurlar xəstələr üçün çox çətin və xoşagəlməz olur.
Tədqiqatçılar nanometr dəlikləri olan yalnız bir silikon çipin istifadəsinə əsaslanan sınaq təklif ediblər. Müayinə olunan şəxsin bir damla qanını analiz edərək, bu çip Alzheimer xəstəliyinin ilkin mərhələləri üçün xarakterik olan zülal strukturlarını 96,4% dəqiqliklə müəyyən etməyə qadirdir.
Texnika artıq uğurla sınaqdan keçirilib və diaqnostik tibb praktikasında tətbiq olunmağa hazırdır. Tezliklə bütün dünyada insanlar xəstəliyin mümkün riski barədə xəbərdarlıq siqnalını ilk simptomlar görünməzdən bir neçə il əvvəl ala biləcəklər.
Bu, onlara xəstəliyin inkişafını yavaşlatmaq və sağlamlıqlarını qorumaq üçün həyat tərzini dəyişdirmək də daxil olmaqla, lazımi addımlar atmağa imkan verəcəkdir.