Amerikalı nevroloqlar insanların qoxuları fərqli qəbul etdiyini aşkar ediblər. Məlum oldu ki, orbitofrontal korteks onların ümumi parametrlərini deyil, əsasən aromaların xüsusi detallarını əks etdirir.

Aztibb.az “Nature Neuroscience” jurnalına istinadən xəbər verir ki, qoxular ətrafımızdakı dünyanı qavrayışımızda mühüm rol oynayır. Alimlər müəyyən ediblər ki, döl artıq ana bətnində olarkən dad və qoxuları hiss edir və onlara reaksiya verir.

Amerikalı tədqiqatçılar yeni təcrübədə qoxuların subyektiv qavranılmasında beynin hansı sahəsinin xüsusi əhəmiyyət kəsb etdiyini öyrəniblər. Təcrübələrdə iştirak edənlər 160 müxtəlif qoxunu qiymətləndirməli və onların xüsusiyyətlərini verməli olublar.

Beynin fəaliyyəti funksional maqnit rezonans görüntüləmə cihazı ilə təhlil edilib. Məlum olub ki, beynin emosiyalara əsaslanan, öyrənməyə cavabdeh bölgəsi olan orbitofrontal korteks qoxuların ümumi deyil, spesifik aspektlərinin qavranılmasında əsas rol oynayır.

Buna görə də insanlar qoxuları çox fərqli qəbul edirlər. Alimlər ümid edirlər ki, bu aspektlər haqqında biliklər qoxu hisslərinin pozulması ilə müşayiət olunan müxtəlif pozğunluqların, nöropsixiyatrik xəstəliklərin müalicəsində alimlərə və həkimlərə kömək edəcək.