Yeni bir araşdırma göstərib ki, infarkt bir gün əvvəl müəyyən əlamətlərlə bilinir.

Aztibb.az haberturk.com-a istinadən xəbər verir ki, ABŞ-ın Los-Anceles şəhərindəki Smidt Ürək İnstitutunda aparılan araşdırma nəticəsində ürək xəstələrinin 50 faizində bəzi simptomların yaxınlaşan infarktdan əvvəl göründüyü məlum olub.

Tədqiqatçılar düşünürlər ki, bu simptomları başa düşmək həkimlərə və xəstələrə 90 faiz ölümlə nəticələnən qəfil infarktların qarşısını almağa kömək edə bilər.

Tədqiqat qrupu 18-85 yaş arası xəstələri müayinə edib. Bu xəstələr əvvəllər infarkt keçirmiş insanlar idi. Xəstələrin infarktdan bir gün əvvəl əlamətləri araşdırılıb.

Müqayisə üçün, tədqiqat qrupu oxşar xəbərdarlıq əlamətləri göstərən, lakin heç vaxt infarkt keçirməyən insanlara da baxıb.

Aparılan müayinələr nəticəsində cinsə görə dəyişən simptomların ürək xəstələrinin yarısında infarktdan bir gün əvvəl ortaya çıxdığı görülüb.

Bu simptomlar qadınlarda təngnəfəsliyin, kişilərdə isə döş qəfəsində ağrıların tez-tez olması ilə müşahidə edilib. Qeyri-adi simptomlara qıcolmaya bənzər hadisələr və anormal tərləmə də daxildir. Bu tapıntılarla alimlər infarktların proqnozlaşdırıla və qarşısının alına biləcəyini düşünür.