Çox zaman əhəmiyyət vermədiyimiz baş-beyin zədələnmələri zamanla xroniki subdural qanama kimi böyük fəsadlara gətirib çıxara bilər.

Aztibb.az xəbər verir ki, Bakı Neyrocərrahiyyə Mərkəzindən verilən məlumata görə, xroniki subdural qanama beyni örtən xarici pərdənin altında beyin səthində yavaş-yavaş inkişaf edən qanamadır.

Qeyd edilir ki, xroniki subdural qanamalarda beyin kiçilərək kəllə sümüyündən uzaqlaşır, yüngül travmalarda belə beyinin səthindəki damarların qopmasına gətirib çıxarır.

Xroniki subdural qanama daha çox 60 yaş üstü şəxslərdə görülür. Zamanla yığılan qan əlamət verəcək böyüklüyə çatdıqda başağrısı, yaddaş itkisi, huşunu itirmə, ürəkbulanma, qusma, ətraflarda gücsüzlük, görmə itkisi kimi əlamətlərlə özünü büruzə verir.

Xroniki subdural qanamalarda müalicə cərrahidir. Kəlləyə açılan dəlikdən (burr hole drenajı) qanama çölə axıdılıb, qoyulan kateter ilə yuyularaq laxtalar təmizlənir.