Epilepsiya xəstələrində ən böyük problemlərdən biri də tutmalar zamanı dişlərin zədələnməsidir. Bəzi insanlar tutma zamanı dişlərini qıcıyır və beləliklə, həm dişlər, həm də ağıziçi toxumalar risk altında qalır.
Aztibb.az xəbər verir ki, Bakı Neyrocərrahiyyə Mərkəzinin instaqram səhifəsində tutmalar zamanı dişləri zərər görmüş birinə necə yardım etməklə bağlı məlumat paylaşılıb.
Qeyd edilib ki, müdaxilə etməmişdən qabaq yıxılmış insanın başının altına yumşaq bir şey qoymaqla sabit tutmağa çalışın. Protez dişlər düşübsə, ehmalca götürüb yuyun və təmizlənmiş protezləri yerinə yerləşdirməyə çalışın, mümkün olmadığı təqdirdə əlavə heç bir müdaxilə etməyin.
Yaxud dişin düşdüyünü görürsünüzsə, götürüb təmizləməyə və təmiz dəsmala, yaxud salfetə büküb stomatoloqa göstərmək üçün saxlayın.
Xəstənin ağız içinin və dişlərin zərər gördüyü hər bir halda ilkin tibbi yardımdan asılı olmayaraq mütləq həkimə müraciət edin.
Unutmayın ki, mütəxəssis müayinəsi zamanı gözlə görülə bilməyən problemlər belə ortaya çıxır və problemin gec təyin olunması uzunmüddətli fəsadlara yol aça bilər.