Diz oynağı bədənimizin ən hərəkətli və ən çox yük daşıyan oynağıdır. Pilləkən enib qalxma, oturub-durmaq, yerimə və qaçma əsnasında dizə düşən yük artır və daima artan yük oynaqda zədələnmələrə gətirib çıxarır. Yaş artdıqca oynaq sürüşkənliyinin azalması, qığırdaq yenilənməsindəki yavaşıma, sümük quruluşdakı deformasiyalar diz oynaqlarında ağrı əmələ gətirir ki, nəticədə xəstədə mexaniki hərəkət məhdudiyyəti yaranır.

Aztibb.az xəbər verir ki, Əməkdar həkim Elviz Qasımov diz ağrılarının əsas səbəblərini sayıb:

- Aşağı ətrafın şaquli oxunun pozulması,
- Diz oynağı iç tərəfindəki sinovial toxuma (medial plika) qalınlığının artaraq diz bükülməsi vaxtı ağrı verməsi,
- Zədələnmə,
- Artıq çəki,
- Həddindən artıq idman və yüklənmə,
- Diz ətrafı əzələlərdə tarazlığın pozulması və zəiflik,
- Yastıayaqlıq,
- Revmatizmal xəstəliklər,
- Diz oynağı bağlarının travmaları,
- Menisk zədələnmələri,
- Artroz (oynaqda duzlaşma və ya qığırdaq aşınması),
- Diz qapağı xəstəlikləri,
- Diz oynağında olan deformasiyalar.

Həkim qeyd edib ki, diz ağrıları erkən dövrdə asan müalicə edilir. Dizdəki problemin irəlilədiyi hallarda cərrahi müdaxilə ilə oynağın əvəz edilməsi (endoprotez qoyulması) ilə nəticələnir.

O, tövsiyə edib ki, aşağıdakı əlamətlərlə qarşılaşırsınızsa mütləq ortoped-travmatoloqa müraciət edin:

- Dizlərdə çöməlmə və ya ayağa qalxmada problem yaşanırsa,
- Dizlərdə bəzi hərəkətlər zamanı tutulma, kilidlənmə olarsa,
- Diz oynaqlarında yeriyərkən, pilləkən enmə və qalxma zamanı ağrılarlar yaranırsa,
- Dizləri qatlayıb oturmaqda çətinlik çəkirsinizsə,
- Dizlər şişirsə.