Mezial temporal skleroz beynin gicgah payındakı neyronların ölümü nəticəsində yaranır və adətən hissəvi (fokal) epilepsiyalar ilə nəticələnir.

Aztibb.az xəbər verir ki, nevroloq Sahilə Ələkbərovanın sözlərinə görə, bu zaman emosiya və hisslərin dəyişikliyi, əzələ spazmları və qıcolmalar kimi müxtəlif simptomlar yaranır.

Nevroloq qeyd edib ki, bəzən bu hissəvi qıcolmalar generalizə olunmuş qıcolmalara keçid verə bilər.

"Beynin travmatik zədələnmələri, infeksiyalar, beyin şişləri, insult bu nahiyədə neyronların ölümünə səbəb olur, bu hissə atrofiyalaşır. Daha çox çapıq toxuması əmələ gəlməyə başlayır. Bu zədələnmə temporal pay epilepsiyalarının əsas səbəbi kimi göstərilir", - deyə həkim vurğulayıb.

Araşdırmalar göstərir ki, temporal pay epilepsiyalarının 70%-nin səbəbi məhz mezial temporal sklerozdur. Xəstəliyin diaqnozu nevroloqun bu diaqnozdan şübhələndiyi hallarda MRT müayinəsi ilə təsdiqlənir. Müalicəsi isə cərrahidir və temporal payın əməliyyatla kəsilib götürülməsi ilə aparılır.