Bəzən fibroadenoma haqqında dəqiq məlumatı olmayanlar fibroadenomanın mütləq bədxassəli şişə çevriləcəyindən narahat olurlar.

Aztibb.az xəbər verir ki, mammoloq-onkoloq Cəlil Bağırovun bildirdiyinə görə, bu kütlə heç də həmişə xərçəngə çevrilmir.

Həkim qeyd edib ki, fibroadenoma sərt bir kütlədir, kistadan fərqli olaraq hətta 1 sm olduqda belə əl ilə rahatlıqla aşkarlana bilər.

"Fibroadenoma çox zaman xərçəngə çevrilmir, lakin getdikcə böyüyə və sayı arta bilər. Fibroadenomalar hamiləlikdə, süd vermə dövründə böyüyə bilər, zahılıq dönəmində isə hətta kiçilə bilər. Bu düyünlər estrogen hormonunun təsiri fonunda böyüyür, ona görə də hamiləlikdə kütlələr daha böyük ölçü alır, menopauza dönəmində isə ölçüləri kiçilir", - deyə onkoloq vurğulayıb.