Aşağı kalorili kofeinli içkilər bədən yağını azalda bilər.

Aztibb.az “BMC Medicine” jurnalına istinadən xəbər verir ki, bu barədə bir qrup isveçli alim açıqlama edib.

Mütəxəssislərin fikrincə, qandakı kofeinin səviyyəsi bədəndəki yağların miqdarına birbaşa təsir göstərir. Tədqiqat üçün təxminən 10 min insanın genetik məlumatlarından istifadə edilib. Tədqiqatın müəllifləri kofeinin parçalanma sürəti ilə əlaqəli genləri təhlil ediblər. Xatırladaq ki, o, qəhvə və çayda olur.

Alimlər qeyd ediblər ki, plazmada kofeinin daha yüksək konsentrasiyası aşağı bədən kütləsi indeksi və ümumi bədən yağ kütləsi, həmçinin II tip diabetin inkişaf riski ilə əlaqələndirilirdi.

Onlar həmçinin izah ediblər ki, testlər bədəndə termogenezi (istilik hasilatı) və yağ oksidləşməsini (yağların enerjiyə çevrilməsini) artıran, maddələr mübadiləsini sürətləndirən kofein qəbul etdikdən sonra çəki və yağ itkisini təsdiqləyib. Lakin yüksək kofeinli içkilərin uzunmüddətli təsiri bilinmir.