Bir çox qaraciyər xəstəlikləri, məsələn, sirroz rezeksiya (orqanın bir hissəsinin çıxarılması) ilə müalicə olunur. Bu cür əməliyyatların isə bir çox fəsadları var. Bu səbəbdən də elm adamları qaraciyəri daha təhlükəsiz və effektiv müalicə etmək üçün üsul axtarışındadırlar.

Aztibb.az poisknews.ru-ya istinadən xəbər verir ki, bir qrup alim zədələnmiş qaraciyər toxumalarının bərpası üçün yeni üsul işləyib. Çıxarılan hissənin yerinə xüsusi tərkibli quraşdırma təklif ediblər. Unikal materiallar sayəsində o, yeni qaraciyər hüceyrələrini böyüdəcək və onun daha sürətli bərpasına imkan verəcək.

Çərçivənin əsasını biopolimerlərdən - təbii mənşəli polisaxaridlərdən ibarət aerogel təşkil edir. Bu qazla doldurulmuş yüksək məsaməli materialdır.

Aerogel artıq heyvanlar üzərində uğurla sınaqdan keçirilib. Material laboratoriya siçovullarının dərisi altına yeridilib, onun toksik olmadığı və canlı orqanizmlər üçün tamamilə təhlükəsiz olduğu təsdiqlənib. Bundan sonra mütəxəssislər preklinik və klinik tədqiqatların tam dövründən keçməli olacaqlar.

Tibbi praktikada üsul bir neçə ildən sonra tətbiq oluna bilər.