100-dən çox ölkənin məlumatlarından istifadə edilərək aparılan qlobal araşdırma, havanın çirklənməsinin insanlarda antibiotiklərə qarşı müqaviməti artırdığını ortaya çıxarıb.

Aztibb.az xəbər verir ki, "Lancet Planetary Health" elmi jurnalında dərc olunan məqaləyə görə, təxminən 20 ildir davam edən araşdırma nəticəsində hər ölkədə və qitədə havanın çirklənməsinin artmasının antibiotiklərə qarşı müqavimətin artması ilə əlaqəli olduğu qənaətinə gəlinib.

Antibiotik müqaviməti qlobal sağlamlıq üçün ən sürətlə artan təhdidlərdən biri kimi qəbul edilir. Antibiotik müqavimətinin ildə 1,3 milyon insana təsir edəcəyi təxmin edilir.

Antibiotik müqavimətinin ən böyük səbəbinin antibiotiklərin həddindən artıq istifadəsi və sui-istifadəsi olduğu düşünülür. Lakin son araşdırma göstərir ki, havanın çirklənməsi ilə bu problem daha da dərinləşir. Çirklənmə ilə ürək xəstəlikləri, astma və ağciyər xərçəngi kimi xroniki xəstəliklər də artır.

Hava çirklənməsində yüzdə 10 artımın antibiotik müqavimətinin yüzdə 1,1 artması ilə əlaqəli olduğunu ortaya qoyan araşdırmada, təkcə 2018-ci ildə hava çirklənməsinin səbəb olduğu antibiotik müqavimətinə görə 480.000 vaxtından əvvəl ölümün baş verdiyi təxmin edilir.

Tədqiqatçılar bu rəqəmin 2050-ci ilə qədər ildə 840 min nəfərə çatmasının mümkün olduğunu düşünürlər.