İngiltərədə bir qrup alim gələcəkdə mümkün xəstəliklər üçün peyvəndlər hazırlamaq üzərində işləməyə başlayıb.
Aztibb.az "Sky News"a istinadən xəbər verir ki, bütün dünyaya təsir edən COVID-19 epidemiyasından sonra heyvanlardakı digər patogenlərin təkamül edə biləcəyini düşünən tədqiqatçılar mümkün peyvəndlər üzərində işləyirlər.
Tədqiqat Böyük Britaniya hökumətinin Sağlamlıq Təhlükəsizliyi Agentliyi (UKHSA) tərəfindən Uiltşirdəki yüksək təhlükəsizliklə təmin olunan Porton Daun laboratoriyasında aparılır.
Bildirilib ki, laboratoriyada çalışan 200 alim heyvan viruslarına qarşı hələ insanlara təsir etməyən vaksinlər hazırlamağa çalışır.
UKHSA-nın baş professoru Dame Jenny Harries bildirib ki, burada etməyə çalışdığımız şey, yeni bir xəstəlik və ya yeni bir patogenlə rastlaşsaq, hazır olmaqdır. Mümkün qədər irəliləmək üçün çox çalışırıq.
Peyvənd tədqiqatlarında iştirak edən komanda bu yaxınlarda yüzdə 30 ölüm nisbəti olan Krım-Konqo virusuna qarşı peyvənd hazırlayıb. Erkən klinik sınaqlarına başlanan peyvəndin yaxın gələcəkdə 24 könüllü üzərində sınaqdan keçirilməsi gözlənilir. Həmçinin laboratoriyada quş qripi, meymun çiçəyi və hanta kimi viruslarla bağlı araşdırmaların aparıldığı məlumdur.
"Sky News"un mövzu ilə bağlı hesabatında bildirlir ki, bəzi patogenlər üzərində tədqiqat yalnız viruslar insanlara yoluxduqdan sonra aparıla bilər.