Daha sağlam olması düşüncəsi ilə istehlak edilən bitki mənşəli məhsulların uzun müddətli xroniki təsirləri ilə yanaşı planlı və ya təcili əməliyyatlarda ölümcül risklər də ola bilər.

Aztibb.az trthaber.com-a istinadən xəbər verir ki, təlimatçı həkim Aylin Nizamoğlu kifayət qədər zərərsiz olduğu bilinən, sağlamlıq və ya arıqlamaq məqsədilə istifadə edilən sarımsaq, yaşıl çay, albalı sapı çayı kimi məhsulların ciddi qanaxmalara, hətta bağırsaq deşilməsinə səbəb ola biləcəyini söyləyib.

Xüsusilə əməliyyatı planlaşdırılan xəstələrin istifadə etdikləri bitki mənşəli məhsullar barədə həkimlərinə məlumat verməli olduqlarını qeyd edən A.Nizamoğlu bildirib ki, bu məhsulların qan durulducu təsiri əməliyyatdan əvvəl etdiyimiz rutin testlərdə əks olunmur.

"Hər şey normal görünsə də, əməliyyat zamanı xəstədə gözlənilmədən qanaxma baş verə bilər. Yaxud ürək ritmini və qan təzyiqini pozan təsirləri ola bilər. Gənc, sağlam xəstələrdə əməliyyat zamanı ürək dayanması ola bilər və bunu düzəltmək üçün verdiyimiz dərmanlar öz təsirini gec göstərir. Hətta ədəbiyyatda çoxlu sarımsaq istehlakı nəticəsində beyin qanaması halları qeyd edilir", - deyə həkim vurğulayıb.