Dağınıq sklerozun arxasında duran Epstein-Barr virusunun bəzi xərçəng növləri ilə yanaşı bu xəstəliklə də əlaqəli olduğu bilinir.
Aztibb.az trthaber.com-a istinadən xəbər verir ki, sözügedən virus çox vaxt öpüşmə zamanı tüpürcək vasitəsilə yayılır və buna görə də onun yaratdığı infeksiyaya xalq arasında öpüşmə xəstəliyi deyilir.
Ən çox gənclərdə görülən virus yorğunluq, halsızlıq, iştahsızlıq kimi əlamətlərlə özünü göstərir. Xəstəliyin simptomları adətən bir aydan iki aya qədər davam edir.
Alimlərin son tapıntılarına görə, dağınıq skleroz virusun ağır nəticələri arasındadır. Beyin və onurğa beynində mesajlar daşıyan sinir lifləri ətrafındakı qoruyucu qabığa təsir göstərir. Adətən 20-30 yaşlarında diaqnoz qoyulan xəstələrdə danışmaq və yeriməkdə çətinlik yarana bilər.
Bununla belə, Epstein-Barr virusuna qarşı hazırlanmış peyvənd yoxdur.
Avstraliya alimləri ilk peyvəndin hazırlanması istiqamətində addımlar atıb. Komanda siçanlar üzərində apardıqları təcrübədə orqanizmin immun sisteminin fəaliyyətində əsas rol oynayan limfa düyünlərini hədəf alan vaksin hazırlaya bilib.
Bu peyvənd təkcə virusla mübarizə aparmaq üçün uzunmüddətli antikorlar və T-hüceyrələri istehsal etməyib, həm də virusla əlaqəli şişlərin böyüməsinə qarşı qoruyan immun reaksiyasını işə salıb. Bu həmçinin virusun fəaliyyətinə erkən maneə törətməklə, xəstəliyə səbəb ola biləcək beyin iltihabı kimi ikinci dərəcəli problemlərin qarşısını alır.
Digər tərəfdən, mütəxəssislər vaksinin hələlik yalnız siçanlar üzərində sınaqdan keçirildiyini bildiriblər. Tədqiqat qrupu yaxın gələcəkdə insanlar üzərində də təcrübələrə başlayacaqlar.