Epilepsiya beyindəki sinir hüceyrələrinin anormal dərəcədə yüksək aktivlik göstərdiyi bir vəziyyətdir.

Aztibb.az trthaber.com-a istinadən xəbər verir ki, uzman həkim Hülya Mavinin sözlərinə görə, bu vəziyyət beyindəki normal elektrik siqnallarının nəzarətsiz şəkildə yayılmasına və tutmaların yaranmasına səbəb olur. Qıcolmalar beynin anormal elektrik aktivliyi nəticəsində yaranan müxtəlif simptomlarla özünü göstərə bilər.

O, qeyd edib ki, uşaqlıqda bəzi ciddi xəstəliklər epilepsiyaya səbəb ola bilər. Epilepsiyanın səbəblərinin tam olaraq anlaşılmadığını ifadə edən həkim vurğulayıb ki, beyindəki struktur anomaliyaları, beyin zədələri, infeksiyalar, genetik faktorlar və bəzi nevroloji xəstəliklər epilepsiya riskini artıra bilər. Doğuş və erkən uşaqlıq dövründə bəzi ciddi xəstəliklər də epilepsiyaya səbəb ola bilər.

Epileptik tutmalar müxtəlif növ ola bilər. Bəzi insanlar huşunu itirir, bəziləri isə əzələ spazmları və zehni çaşqınlıq yaşaya bilər. Epilepsiya diaqnozu müddət və tezlik nəzərə alınmaqla mütəxəssis nevroloq tərəfindən qoyulur. Elektroensefaloqramma (EEG) kimi testlər xəstəliyin diaqnozunda mühüm rol oynayır.

Epilepsiyanın müalicəsi xəstənin tutmalarının növü, tezliyi və şiddəti ilə müəyyən edilir. Antiepileptik dərmanlar müəyyən qədər təsirli olur. Müalicəyə baxmayaraq, qıcolmaları tamamilə aradan qaldırmaq həmişə mümkün olmaya bilər, lakin uyğun dərmanlar və müalicə üsulları ilə qıcolmaların sayı və şiddəti azaldıla bilər.

Bəzi inkişaf etmiş hallarda cərrahi müdaxilə düşünülə bilər. Vagal Sinir Stimulyasiyası (VSS) epilepsiya xəstələri üçün dərman müalicəsinin kifayət etmədiyi hallarda perspektivli alternativ müalicə variantı təklif edir.