London Kral Kollecinin alimləri yuxu və onun sağlamlığa təsiri ilə bağlı yeni araşdırma aparıblar. Məlum olub ki, həftə sonları uzun müddət yatmaq orqanizmə mənfi təsir göstərə bilər.

Aztibb.az "Daily Mail"ə istinadən bildirir ki, alimlər doqquz yüzdən çox sağlam insanı tədqiq edərək müəyyən ediblər ki, həftə sonları əlavə saat yarım yatmaq orqanizmin bioloji ritmlərini pozur, bu da immunitet, həzm və digər sistemlərə təsir göstərir.

Məlum olub ki, yuxu rejiminin pozulması bağırsaq mikroflorasına təsir edərək zərərli bakteriyaların çoxalmasına səbəb olur. Həftə sonları uzun saatlar yatan insanlar daha çox piylənmə, ürək xəstəlikləri və diabet kimi problemlərlə qarşılaşıblar. Həm də daha çox şəkərli içkilər içiblər və daha az meyvə yeyiblər.

Tədqiqatçılar belə qənaətə gəliblər ki, nizamlı yuxu rejimi bağırsaq mikroflorasına müsbət təsir edir. Buna görə də, yuxu rejimini izləmək və bədənimizin optimal işləməsi üçün onu sabit saxlamağa çalışmaq vacibdir.