HBV-nun ötürülməsi ən çox perinatal olaraq anadan uşağa, eləcə də yoluxmuş insanın qan və ya digər bədən mayeləri ilə təmas zamanı baş verir. HBV ötürülməsi ilk növbədə perkutan təmas və ya selikli qişanın yoluxmuş qan, tüpürcək, aybaşı və vaginal axıntı, sperma daxil olmaqla müxtəlif bədən mayeləri ilə təması nəticəsində baş verir.

Aztibb.az qeyd olunan xəstəliyin müalicəsi üzrə metodik vəsaitə əsaslanaraq məlumat verir ki, Hepatit B infeksiyası cinsi əlaqə yolu ilə baş verə bilər, xüsusən peyvənd olunmamış kişilərlə cinsi əlaqədə olan kişilərdə və çox cinsi partnyorları olan və ya seks işçiləri ilə cinsi əlaqədə olan heteroseksual şəxslərdə.

Virusun yoluxması tibbi, cərrahi və diş prosedurları zamanı təsadüfən az miqdarda qan və ya digər infeksiyalaşmış bədən mayelərinin sağlam insana düşməsi və ya yoluxmuş qanla çirklənmiş skalpel və digər tibbi avadanlıq vasitəsilə mümkündür.

Sterilizasiya olunmamış şprislər və iynələr istifadə edildikdə, venadaxili və ya perkutan dərman, o cümlədən psixotrop maddələr yeridilməsi, döymə (tatuaj), pirsinq və akupunktur vasitəsilə də ötürülmə baş verə bilər.