İlk olaraq heyvanın dişləməsi və ya cızılması dərinin bütövlüyünü pozubsa, potensial olaraq övladınıza quduzluq xəstəliyini ötürmək üçün kifayətdir.

Aztibb.az xəbər verir ki, pediatr Kənan Qarayevin bildirdiyinə görə, belə bir vəziyyətdə dəri heç vaxt zədələnməyibsə və ya peyvənd olunduğuna əmin olduğumuz ev heyvanıdırsa, qorxmağa ehtiyac yoxdur.

Amma sahibsiz heyvandırsa və dərisi zədələnibsə və ya peyvənd olunmamış ev heyvanıdırsa bu tədbirlər diqqətdə saxlanılmalıdır:

- Həmin ərazini dərhal bol su və sabunla ən az 5 dəqiqə yumalı, qanaxma olarsa sarğısını təmiz bir parça ilə bağlamalıyıq.

- Vaxt itirmədən xəstəxanaya müraciət etməli və peyvənd olmalısınız.

Pediatr quduzluqla bağlı bildirib ki, bu xəstəlik uduz virusunun törətdiyi xəstəlikdir, təəssüf ki, müalicəsi yoxdur və ölümlə nəticələnir.

Qeyd edib ki, ən çox peyvənd olunmamış itin dişləməsi, daha sonra pişiyin cırmaqlaması və vəhşi heyvanların (tülkü, yarasa və s.) hücumu ilə keçir.

Simptomlar qızdırma, ürəkbulanma və qusma ilə başlayır, sonra narahatlıq, çaşqınlıq, su qorxusu, halüsinasiyalar, aqressiya ilə davam edir və tüpürcək ifrazının artması, udma çətinliyi, iflic və ölümlə nəticələnir.

Heyvanlarımızı peyvənd etməyi və heyvan dişləməsi və ya yaralaması zamanı nə edəcəyimizi unutmayaq!