Sinqapur Milli Universitetinin (NUS) tədqiqatçıları DNT-dən istifadə edərək məlumatların saxlanması üçün tamamilə yeni bir yanaşma inkişaf etdiriblər.

Aztibb.az xəbər verir ki, bu barədə “Reedus” nəşri universitetin mətbuat xidmətinə istinadən məlumat yayıb.

Onların innovativ metodu “BacCam”kimi tanınan rəqəmsal kameranın bioloji versiyasının yaradılmasına əsaslanır.

Bu unikal texnologiya şəkilləri və məlumatları birbaşa canlı hüceyrələrə yazmağa, hər bir hüceyrə üçün xüsusi barkodlar qurmağa və sonra onlardan məlumat çıxarmağa imkan verir.

Təcrübələr zamanı tədqiqatçılar öyrəniblər ki, hətta kiçik bir DNT parçası da böyük həcmdə - 215 milyon giqabayta qədər məlumat saxlaya bilir. Düzgün şəraitdə bu məlumatlar minlərlə il saxlanıla bilər.

“BacCam”ın işi xüsusi hazırlanmış bakteriyalarda genləri aktivləşdirən xüsusi mavi və qırmızı lazerlərin istifadəsinə əsaslanır. Daha sonra genlər məlumatları çeşidləmək üçün istifadə olunur və məlumatı çıxarmaq üçün maşın öyrənmə alqoritmlərindən istifadə olunur.

Alimlər ümid edirlər ki, onların yeni DNT əsaslı məlumat saxlama yanaşması gələcəkdə daha səmərəli metodların inkişafı üçün əsas olacaq.