1801-ci il iyulun 14-də alman təbiətşünası, müasir müqayisəli anatomiya, embriologiya və fiziologiyanın banilərindən biri İohan Peter Müller (1801-1858) anadan olub.

İohan Peter Müller Bonn Universitetində təhsil alıb. 1830-cu ildə professor elmi adını qazanır. 1833-cü ildə Berlin Humboldt Universitetində anatomiya və fiziologiya kafedrasını boynuna götürən alim ölənə qədər bu işi davam etdirir.

Səs, nitq və eşitmə kimi fizioloji problemlərə töhfə verən İ.P.Müllerin limfa, şil və qanın kimyəvi və fiziki xüsusiyyətləri ilə bağlı araşdırmaları da var.

Alimin 1840-cı ildə nəşr olunan "Handbuch der Physiologie des Menschen" əsəri fiziologiya tarixində yeni bir dövrün başlanğıcı kimi qəbul edilir. İnsan quruluşu, müqayisəli anatomiya, kimya və bir çox başqa fizika elmlərində əldə edilən nəticələr ilk dəfə olaraq bu kitabda fizioloji metodların köməyi ilə izah edilir.

Aztibb.az