Rusiyada 60 yaşlı kişi boğazında yad cisim hissi, eləcə də udma çətinliyi şikayətləri ilə xəstəxanaya yerləşdirilib.

Aztibb.az rimo.ru-ya istinadən yazır ki, həkimlər qastroskopik müayinədən sonra onun qida borusunda iri yad cisim aşkar ediblər. Məlum olub ki, bir gün əvvəl kişi şaftalı yeyib və səhlənkarlıq ucbatından tumu ilə birlikdə udub.

Ümumi anesteziya altında endoskopik üsulla xəstənin yemək borusundan yad cism çıxarılıb. Əməliyyat uğurla keçib və təxminən 10 dəqiqə çəkib.

Mütəxəssislər yemək zamanı tələsməməyi tövsiyə edir.

Bu hal baş verərsə, təcili xəstəxanaya çatdırılmısınızsa ilk olaraq, endoskopik (kamera) müayinədən keçməlisiniz. Çünki, bəzi hallarda yad cisimin çıxarılması üçün xüsusi avadanlıq və təcrübəyə ehtiyac olur. Əgər yad cisimin forması firintili-çıxıntılı olarsa və ya qırtlağa düşmə bucağı fərqli olarsa həyati təhlükəyə yol aça bilər.

Böyük adamın boğazında yad cisim qaldıqda adətən ilk yardım məqsədi ilə Qreymlix üsulundan istifadə olunur.

Qreymlix üsulu necə həyata keçirilir?

Zərərçəkəni arxadan qucaqlayıb əlinizin birini yumruq şəklində sıxın və digər əlinizlə yumruğunuzu tutun. Yumruğunuzu göbəyindən bir qədər yuxarıda olmaqla döş sümüyü qurtaran yerdə yerləşdirin.

Dirsəklərinizi önə verərək, hərəkət istiqaməti dərinə və yuxarı olmaqla cəld hərəkətlərlə yumruğunuzla zərərçəkənin qarnına sıxın.

Zərərçəkənin qarnına təzyiq edilməsini yad cisim tənəffüs yolundan çıxana qədər, həkim gələnə qədər və ya zərərçəkən huşunu itirənə qədər davam etdirmək lazımdır. Əksər hallarda Qreymlix üsulu effektli olur və yad cisim boğazdan çıxır.