Şeffild Universitetinin alimləri bal arılarının tez və dəqiq qərar qəbul etmə qabiliyyətini üzə çıxaran yeni araşdırma dərc ediblər.

Aztibb.az hpcwire.com-a istinadən xəbər verir ki, bu tədqiqat daha səmərəli robotlar və avtonom maşınların inkişafına kömək edə bilər.

Arılar küncüt böyüklüyündə beyinə malik olsalar da, yenə də müvəffəqiyyətlə qərar verə bilirlər.

Tədqiqat arıların hansı çiçəkləri araşdırmaq lazım olduğunu müəyyən etmək üçün istifadə etdikləri kompleks strategiyaları ortaya qoyub. Onların qərarlarının kiçik beyin ölçüsünə baxmayaraq, insanlardan daha dəqiq olduğu müəyyən edilib.

Araşdırma bal arısının beyin funksiyası və inkişafı haqqında bilikləri genişləndirib. Şeffild alimləri açıqlayıb ki, bu kəşflər arılar kimi səmərəli qərarlar qəbul edə bilən yeni nəsil robotlar və avtonom maşınları ilhamlandırır.

Qeyd edilib ki, arılar hansı çiçəyin üzərində oturub araşdırmaq lazım olduğunu müəyyən etmək üçün rəng və ya qoxuda ən kiçik fərqdən istifadə edirlər. Bu yanaşma avtonom düşünə və qərar qəbul edə bilən daha təkmil və etibarlı robotlar yaratmaq üçün istifadə edilə bilər.