“Kaxovka” su elektrik stansiyasının partlamasından sonra Xerson vilayətində baş verən daşqınlar səbəbindən Qara dənizin qərb hissəsində balıq ovu arta bilər.

Aztibb.az xəbər verir ki, ekoloq Aleksey Medvedkov bu barədə “RİA Novosti”yə bildirib.

Ekspertin fikrincə, suyun gur olması fitoplanktonun məhsuldarlığını artıra bilər. Mütəxəssis eyni zamanda qeyd edib ki, balığın keyfiyyəti sual altında qalacaq və vəziyyət hərtərəfli öyrənilməlidir.

O, nümunə olaraq Çində 1998 və 2010-cu illərdə Yantszı çayında baş verən böyük daşqınları, ardınca Şərqi Çin dənizində kommersiya ovlarının artmasını göstərib.

Bir müddət əvvəl Türkiyənin Yaxın Şərq Texniki Universitetinin (ODTÜ) elmi işçisi Mustafa Mantıkcı xəbərdarlıq etmişdi ki, Xerson vilayətindəki Kaxovskaya su elektrik stansiyasının bəndinin dağıdılması Qara dənizin zəhərli çirklənməsinə səbəb ola bilər.

Alim hesab edir ki, təhlükəli məişət və sənaye tullantıları, o cümlədən radioaktiv tullantılar su ilə dənizə yuyula bilər.