ABŞ-da Xəstəliklərə Nəzarət və Qarşısının Alınması Mərkəzləri (CDC) bazar ertəsi son iki ayda beş malyariya hadisəsinin qeydə alınması ilə bağlı xəbərdarlıq edib.

Aztibb.az interfaks.ru-ya istinadən xəbər verir ki, bununla bağlı hesbata görə, belə hallar son 20 ildə ilkdir. Son təsdiqlənmiş yerli yoluxma hadisəsi 2003-cü ildə, Florida ştatında səkkiz nəfərin yoluxduğu zaman baş verib.

CDC, ABŞ-da malyariyaya yoluxma riskinin "son dərəcə aşağı olaraq qaldığını" söyləyib.

Bununla belə, ekspertlər amerikalıların bu ehtimaldan xəbərdar olması və ağcaqanad dişləməsinin qarşısını almaq üçün addımlar atmalı olduqlarını bildiriblər.

CDC xəbərdarlıq edib ki, həkimlər və xəstəxanalar 24 saat ərzində malyariya xəstəsinə tez diaqnoz qoymaq üçün bir plana sahib olmalıdırlar.

Xəstəlik zamanı qızdırma, baş ağrısı, titrətmə, əzələ ağrısı və yorğunluq baş verir. Semptomlar adətən həşərat dişləməsindən 10 gün-dörd həftə sonra görünür.