Əvvəlki araşdırmalar göstərib ki, kosmik səyahətlər, xüsusən də uzunmüddətli missiyalar təhlükəlidir. Kosmosda sıfır cazibə qüvvəsində sərf olunan vaxt bütün bədənə - beyindən sümüklərə qədər təsir edir. Amma hansı orqanların nə qədər əziyyət çəkdiyi barədə konkret təfərrüatlar yox idi.

Aztibb.az “Scientific Reports” nəşrinə istinadən xəbər veri ki, alimlər yeni araşdırmada kosmos uçuşlarının müddəti və aralarındakı zamanın insan beynindəki mayeyə necə təsir edə biləcəyini araşdırıblar.

Beyində dörd cibdə (mədəciklər) saxlanılan bu onurğa beyni mayesi beyni yumşaltmağa və qorumağa kömək edir. O, həmçinin hüceyrə tullantılarının yuyulmasında və qan dövranından qida maddələrinin çatdırılmasında rol oynayır.

Florida Universitetinin, NASA-nın Conson Kosmik Mərkəzinin və digər ABŞ agentliklərinin tədqiqatçıları müəyyən ediblər ki, kosmosa uçuşlar kosmonavtların kosmosda keçirdikləri zamandan asılı olaraq mədəciklərin ölçüsünü və beyin mayesinin həcmini artırır.

Mədəcik ölçüsündə və əlavə beyin mayesində bu artım əvvəlki tədqiqatlarda da müşahidə edilib və beyinin mikroqravitasiya şəraitində kəllə daxilində yuxarıya doğru yerdəyişməsi ilə müşayiət olunub ki, bu da öz növbəsində mayenin yenidən paylanmasını təşviq edib.

30 astronavtın MRT nəticəsindən istifadə edərək və əvvəlki araşdırmalara əsaslanaraq, tədqiqatçılar müəyyən ediblər ki, kosmosa uçuş nə qədər uzun olarsa, mədəciyin ölçüsü bir o qədər böyüyür.

Bu tədqiqat mədəcik ölçüsündə və beyin maye səviyyələrində dəyişikliklərin sonrakı sağlamlığa necə təsir etdiyini araşdırmayıb. Lakin aydındır ki, dəyişikliklər beyində baş verir və missiyaların müddəti və tezliyindən təsirlənir. Elm adamları daha əvvəl onurğa beynindəki dəyişmələri astronavtlarda göz problemləri ilə əlaqələndirmişdilər.