Uşaqlarda vərdişlər əyləncə və ya sakitləşmək üçün mübarizə mexanizmi kimi inkişaf edə bilər. Bəzi uşaqlar isə diqqət çəkmək və ya valideynlərini manipulyasiya etmək üçün pis vərdişlərlə məşğul olurlar.

Aztibb.az xəbər verir ki, pediatr Kənan Qarayevin sözlərinə görə, əksər vərdişlər uşaq məktəb yaşına çatdıqda yox olur, çünki uşaq artıq buna ehtiyac duymur.

Ancaq uşağınıza vərdişdən qurtulmasını zamana buraxmaq istəmirsinizsə, bu addımlar sizə kömək edə bilər:

Davranışda nəyi və niyə bəyənmədiyinizi sakitcə izah edin

"Dırnaqlarını yeməyindən xoşum gəlmir. Bu gözəl görünmür. Bunu dayandırmağa cəhd edə bilərsənmi?" kimi fikir bildirin. Ən əsası, növbəti dəfə dırnaq yediyini görəndə danlamayın. Cəza və ya tənqid davranışın artmasına səbəb ola bilər.

Alternativ davranışlar təklif edin

Məsələn, əgər uşağınız dırnaqlarını yeyirsə, “dırnaqlarını yemə!” demək əvəzinə, “barmaqlarını məşğul edək?” deyin. Məsələn, mətbəxdə sizə kömək etmək və ya şəkil çəkmək və s. diqqətini yayındıra bilər.

Özünü idarə etməyini mükafatlandırın

Məsələn, kiçik qızınızın dırnaqlarının uzanmasına icazə verərsə, dırnaq boyası istifadə etməsinə icazə verin. Və ya oğlunuz hər dəfə baş barmağını əmməkdən imtina etdikdə, ona stiker və ya digər kiçik mükafat verməklə müsbət davranışı qiymətləndirin.

Əgər yaxşı davranışı fərq etməsəniz, zamanla o, yox olacaq. Yeni, müsbət vərdiş köhnəsi yoxa çıxmazdan əvvəl möhkəm şəkildə qurulmalıdır.