Bədənimizdəki ən böyük damar olan aorta damarı, ürəkdən birbaşa çıxan və bütün orqanlara təmiz qan daşıyan "əsas qan xətti"dir.

Aztibb.az xəbər verir ki, ürək-damar cərrahı Ramil Əliyevin sözlərinə görə, şəxsin boy və çəkisini nəzərə alaraq, aorta dəqiqədə 5-7 litr qan daşıyır: “Bu qanı daşıyarkən, ürəyin atış gücünə və bədən quruluşuna görə içində müəyyən bir təzyiq (80 - 140 mmHg) mövcuddur (qan təzyiqi). Aorta müxtəlif səbəblərdən bədəndə səssizcə böyüyə bilər. Bunun erkən müəyyən edilməsi lazımdır”.

Həkim qeyd edib ki, aorta adlandırdığımız damar, ürəkdən çıxdıqdan sonra vücuda dağılan qanı pompalayan ana arteriyadır. Aortanın diametri ürəkdən çıxdığı qisimdə təxminən 2,5 smdir. Vücudda belə böyük diametrli başqa bir damar yoxdur.

Müxtəlif səbəblərə görə aortanın diametri arta bilər və genişlənə bilər. Buna tibbdə anevrizma deyilir. Anevrizma müəyyən bir müddət sonra daha geniş olduqda, yırtılma ehtimalı vardır. İçindən keçən qan çölə doğru axar və qonşu orqanlara təsir edəcək səviyyəyə çatarsa partlama baş verir.

Genişlənmiş aortun digər bir ağırlaşması disseksiya (içəriyə doğru yırtılma) adlanır. Bunların hər ikisi də çox təhlükəli patoloji dəyişikliklərdir və dərhal müalicə tələb edir.

Aorta ürəyin sol ventrikülündən gəlir və döş və qarın boşluğu içindən gedir. Aortanın döş qəfəsi hissəsində yaranan anevrizmalara torasik anevrizmalar deyilir. Qarın boşluğu hissəsində yarananlara isə abdominal anevrizmalar deyilir.