Septik artrit infeksiya nəticəsində yaranan oynağın iltihabi xəstəliyidir. Septik artriti həm də infeksion artrit də adlandırırlar.
Aztibb.az xəbər verir ki, revmatoloq Camal Hacıyevin bildirdiyinə görə, infeksiya adətən bakteriyalar tərəfindən törədilir. Törədici bəzi hallarda virus və göbələk də ola bilər.
Adətən septik artrit bir iri oynağı, məsələn, diz və ya bud-çanaq oynağını zədələyir. Nadir hallarda septik artrit bir neçə oynağı zədələyə bilər.
Həkim qeyd edib ki, əsas şikayət oynaqda güclü ağrı, oynaqda şişkinlik və temperaturun yüksəlməsidir.
Revmatoloq septik artritin digər əlamətlərini də sadalayıb:
-Yorğunluq və ümumi zəiflik;
-Yüksək hərarət;
-Oynaqda hərəkət məhdudluğu;
-Xüsusən hərəkət zamanı zədəli oynaqda güclü ağrı;
-Şişkinlik (oynaqda mayenin miqdarının artması);
-Oynaqda yerli hərarətin qalxması.
