Uşaq serebral iflici çox tez-tez rast gəlinən və müxtəlif səbəblərlə ortaya çıxan statik bir beyin patologiyasıdır.

Aztibb.az xəbər verir ki, defektoloq-loqoped Nuriyyə Aslanovanın bildirdiyinə görə, xəstəliyi yaradan səbəblər çoxdur və əksər hallarda bu, hamiləlik, eləcə də doğuş zamanı hər hansısa problemdən, virusdan tutmuş hipoksiyaya qədər uzanan, eyni zamanda genetik problemlərdən əmələ gəlir.

Xəstəliyin əsas əlaməti uşaqlarda inkişafdan geri qalma və ya əzələ tonusunda dəyişiklik, hərəkət inkişafının ləngiməsi və pozulmasıdır.

“Bu gün bir çox valideyn mütəxəssisə müraciət edəndə öncə uşaq düzələcəkmi sualını verir. Bu həm həkim, həm də valideyn üçün müalicə zamanı çətinlik yaradır. Çünki bu xəstəliyə düçar olmuş uşaqlar əksər vaxtlarda sağalmır”, – mütəxəssis qeyd edib.

Amma burada məqsəd o uşaqların həyata uyğunlaşma səviyyəsini mümkün qədər artırmaqdır. Onların həyata bağlılığını təmin etmək, başqa uşaqlara yaxınlaşdırmaqdır. Bu uşaqlara erkən yaşlar xüsusi idman lazımdır.

Nitq probleminin aradan qaldırılması üçün loqopedlə işləmək lazımdır. Əqli gerilik üçün isə loqoped və psixoloq tərəfindən xüsusi məşğələlər keçməlidir. Bunlar hamısı 1 yaşdan sonra artıq başlamalıdır. Bütün bunlar müntəzəm şəkildə olarsa, yaxşı nəticə alına bilər.