Mayın 9-u və 10-da Yer kürəsində G2 səviyyəli maqnit qasırğalarının müşahidə ediləcəyi xəbəri fonunda geofizik Natalya Kleimenova belə günlərdə insult və infarkt təhlükəsini xatırladıb.

Aztibb.az primamedia.ru-ya istinadən xəbər verir ki, mütəxəssisin fikirlərinə görə, bu zaman məhz geomaqnit sahəsinin dalğalanması mühüm rol oynayır. Onlar 1-2 saniyəlik bir müddətə çatdıqda və insan ürəyinin ritmi ilə üst-üstə düşdükdə, xəstə insanlarda ciddi problemlər, yəni infarkt və insult yarana bilər. Ən çox bu dalğalanmalar qış mövsümündə insan sağlamlığına təsir edir. Elmi araşdırmaların göstərdiyi kimi, ürək problemləri ilə bağlı şikayətlər adətən bu dalğalanmaların baş vermə vaxtı ilə üst-üstə düşür.

Onlar ən çox səhər saat 4-5 radələrində sübh çağında müşahidə olunur. Bu zaman insan xüsusilə həssas olur, çünki onun immuniteti zəifləyir. Həkimlər bu zaman şikayətlərin sayının artdığını qeyd edirlər. Bu, bir qayda olaraq, xəstə insanlarda müşahidə olunur. Bu dalğalanmalar adətən planetin sağlam sakinlərinə təsir etmir. Hansı ki, bu da müxtəlif enliklərdə aparılan çoxsaylı təcrübələrlə təsdiqlənir.

Qeyd edək ki, maqnit qasırğaları digər xoşagəlməz simptomları, o cümlədən oynaqlarda ağrı, işığa və səsə ağrılı reaksiya, yuxusuzluq, həmçinin zəiflik və əsəbilik də yarada bilər.