Əksər insanlar tam sağalmaq üçün 7-8 saat yuxuya ehtiyac duyurlar. Çox az yuxu sonradan bir çox xəstəliyə səbəb ola bilər.

Aztibb.az xəbər verir ki, bunu "Arqumentı i Faktı" nəşrinə müsahibəsində psixoterapevt Yuri Valba deyib.

“Mütəmadi olaraq 6 saatdan az yatan insanda təkcə əsəb pozğunluqları deyil, həm də ürək, qan damarları və maddələr mübadiləsi ilə bağlı problemlər yarana bilər. Qısa yuxu sindromu (insan gün ərzində 6 saatdan az yatdıqda, yuxusuzluq hiss etmədikdə) həm genetik xüsusiyyət, həm də vərdiş məsələsi ola bilər (bunun üçün bir-iki ay lazımınca yatmamaq kifayətdir),” həkim bildirib.

Eyni zamanda həkim qeyd edib ki, əgər birinci halda qısa yuxu norma sayılırsa, ikincidə bu, istər-istəməz sağlamlıq problemlərinə gətirib çıxaracaq.

Həkim xatırladıb ki, yuxu zamanı beyin orqanizmdə olan zədələri aradan qaldırır, hüceyrələrin tullantı məhsullarını xaric edir. Məsələn, beta-amiloid zülalının yığılması kimi "tullantı" demensiyanın səbəblərindən birinə çevrilə bilər. Bir yuxusuz gecə belə beta-amiloidin miqdarını 25% artırır.