Sidik ifrazının pozulması gündəlik sidiyin miqdarının dəyişilməsi yaxud onun ifraz olunma ritminin pozulması ilə xarakterizə olunur.
Aztibb.az xəbər verir ki, uzman uroloq, androloq Ülviyyə Əliyeva sağlam adamın gün ərzində 1,5 litir sidik ifraz etdiyini bildirib.
Həkim qeyd edib ki, müəyyən kütlə ifraz olunan sidiyin miqdarına diurez deyilir. Gündəlik diurez 2 litrdən çox olduqda poliuriya adlanır. Poliuriya böyrək və ya qeyri böyrək mənşəli ola bilir.
Böyrək mənşəli poliuriya adətən sidiyin nisbi sıxlığının azalması ilə gedir və çox ağır böyrək xəstəliklərində müşahidə olunur.
Qeyri-böyrək mənşəli poliuriya çoxlu miqdarda maye qəbul edildiyi zaman baş verir. Şəkərli diabet zamanı poliuriya sidiyin nisbi sıxlığının artması ilə müşayiət olunur.
Sidiyin gündəlik miqdarının 500 ml-dən az olması oliquriya adlanır. Böyrək mənşəli oliquriya kəskin qlomerulonefritdə, kəskin böyrək çatışmazlığının oliqoanuriya mərhələsində baş verir.
Qeyri-böyrək mənşəli oliquriya az maye qəbul etdikdə, quru, isti yerdə çox olduqda, həddən artıq tərlədikdə, qusduqda və ishal zamanı, ürək çatışmazlığının bəzi mərhələlərində aşkar edilir.
Gündəlik sidiyin 50 ml-dən az olması anuriya adlanır. Anuriya sidiyin yuxarı sidik yollarından sidik kisəsinə daxil olmasının kəsilməsi kimi başa düşülməlidir.