6-cı xəstəlik uşaqlıq dövründə rast gəlinən səpgili infeksion xəstəliklərdən biridir. Herpes viruslar ailəsindən olan HHV-6 tərəfindən törədilir.

Aztibb.az xəbər verir ki, pediatr Nigar Abdullayevanın sözlərinə görə xəstəliyin inkubasiya dövrü 9-10 gündür. 6ay ilə 3 yaş arası uşaqlarda rast gəlinir. 6 aydan kiçik uşaqlarda bu xəstəliyə rastlanılmır. Çünki anadan keçən antikorlar qoruyucu olur.

Xəstəlik ilkin olaraq qızdırma ilə başlayır və çox yüksək dərəcələrə qədər yüksəlir (40°C). Əsas əlaməti 3-5 gün davam edən qızdırma kəskin şəkildə düşdükdən sonra səpgilərin yaranmasıdır.

Səpgilər çəhrayı rəngdə olur, əsasən bədəndə və üzdə yerləşir, 1-3 günə tamamilə itir.

6-cı xəstəlik uşaqlarda febril qıcolmalara səbəb olur. Ən sıx rastlanan ağırlaşma orta qulaq iltihabı-otitdir. Çox nadir olsa da 6-cı xəstəlik ensefalit, aseptik meningitlə ağırlaşa bilər.

Xəstəlikdən sonra ömürlük immunitet formalaşır. Diaqnoz sizə klinik əlamətlərə əsasən qoyulur.

6-cı xəstəliyi digər səpgili infeksion xəstəliklərdən - məxmərək, qızılca, skarlatinadan ayırd etmək çox önəmlidir.