Stenokardiya həm qadınlar, həm də kişilər üçün istənilən yaşda eyni təhlükə daşıyır. Əsasən yaşlı insanlar arasında daha geniş yayılıb.

Aztibb.az xəbər verir ki, Liman Klinika instaqram səhifəsində stenokardiyanın yaranma səbəbləri və risk faktorları barədə məlumat paylaşıb.

Stenokardiya bütün digər xəstəliklərdə olduğu kimi, ciddi yanaşma tələb edir, əks halda, növbəti stenokardiya tutması miokard infarktı və hətta ürəyin tamamilə dayanmasına səbəb ola bilər.

Stenokardiyanın əsas səbəbi ateroskleroz və ya ürək arteriyası tac damarlarının spazmıdır, bu da öz növbəsində, koranar arteriyaların daralmasına, yaxud da tamamilə tutulmasına gətirib çıxarır.

Nəticədə qan və onunla birgə oksigenin ürəyə daşınması pisləşir və ya dayanır, ürək əzələsinin oksigen aclığı yaranır və stenokardiya tutması inkişaf edir.

Stenokardiyaya səbəb ola biləcək risk faktorları aşağıdakılardır:

- Siqaret çəkmək;
- Şəkərli diabet;
- Artıq çəki və piylənmə;
- Azhərəkətli həyat tərzi;
- Qanda xolesterin artıqlığı;
- Spirtli içkilərdən sui istifadə;
- Tac damarların patologiyası;
- Ürək-damar sisteminin anadangəlmə qüsurları;
- Arterial təzyiqin dayanıqlı yüksək olması (hipertoniya).