Kompüter monitorları və ya adi televiziya ekranları vasitəsilə insan beyninə lazımi informasiyanı (fikri, ideyanı, baxışı, kodu və s.) yeritməyə qadir olan metodlar içərisində bu gün elmə məlum olan, hələlik yeganə və ən güclü təsir üsulu “25-ci kadr virusu” vasitəsi ilə olur.

Aztibb.az-a NA-Loqopedik Psixoloji Mərkəzdən verilən məlumata görə, hətta min illərdən bəri insan oğluna məlum olan hipnoz da təsir gücünə görə ondan geri qalır. Təsirin mexanizmi insan beyninin unikal bir xüsusiyyəti ilə bağlıdır.

Belə ki, kinomotoqrafiyanın yarandığı ilk gündən bəri elm insanın yalnız 25 kadr/saniyə sürəti ilə verilən video lentləri normal qavrayıb, digər sürətlərin isə ekranda zolaqlar axını şəklində müşahidə edildiyi müəyyən edilib.

Hazırda müasir elm bu sürətin ayrı-ayrı canlılar üçün bir-birindən fərqli olduğunu müəyyən edib. Məsələn, arılar üçün bu sürət saniyədə 300, tarakanlar üçün isə 12 kadra bərabərdir.

XX əsrin ikinci yarısında psixoloqlar bir tədqiqatda 25 kadr arasına filmə heç bir aidiyyəti olmayan ayrıca bir müstəqil kadr yerləşdirməyi qərara alıblar və nəticəsi heyrətamiz olub.

Filmə baxanlar sonralar onun bütün məzmununu unutsalar da, bu yeganə kadrı beyinlərindən heç cür silə bilməyiblər.