Terapevtlər xroniki xəstəliklərin yazda daha da kəskinləşdiyini bildirilər.

Aztibb.az mütəxəssislərin rəyinə əsaslanaraq bildirir ki, immun sistemi zəif olanlar temperaturun, mövsümün dəyişməsinə həssas olurlar. Belə insanlarda yaz fəslində ağciyər, mədə-bağırsaq sistemi xəstəlikləri kəskinləşir. İmmun sistemi zəif olan insanlarda ümumi halsızlıq, infeksion xəstəliklərə qarşı müqavimət və iş qabiliyyəti zəifləyir.

Mövsüm dəyişməsi ilə əlaqədar vitamin balansı zəifləyən insanlarda halsızlıq, gücdən düşmə, ətraf mühitə qarşı laqeydlik yaranır. Belə insanlar əsasən yuxulu olur və bütün günü yatmaq istəyirlər. Bunun qarşısını almaq üçün ilk növbədə xəstəliklərin müalicəsinə başlamaq lazımdır.

Mövsüm dəyişkənliyi ilə bağlı allergik xəstəliklər də kəskin surətdə artır. Bu isə özünü qızdırma, ishal və qusma ilə göstərir.

Yaz mövsümü insanların psixoloji vəziyyətinə də ciddi təsir göstərir. Bu mövsümdə orqanizmdə hormonal aktivlik güclənir.  İnsanın qanının qaynaması hormonal aktivlik nəticəsində baş verir və orqanizmdə biokimyəvi stress yaranır. Biokimyəvi stress insan psixologiyasında ciddi fəsadlar yaradır, depressiyalara, intiharlara meyl artır.

Yaz xəstəliklərindən qorunmaq üçün açıq havada çox gəzmək, meyvə-tərəvəz məhsullarından daha çox istifadə və vitamin qəbulu lazımdır.