Proktoloq kimdir? Proktoloq - bağırsaq, kolon və ətraf toxumaların yoluxucu, parazitar, anadangəlmə, iltihabi və onkoloji xəstəliklərini müalicə edir.

Aztibb.az tibbin bu ixtisası və ixtisas üzrə həkimin vəzifələri haqqında qısa məlumatı təqdim edir:

Proktoloq xəstələri müayinə edir və anamnez toplayır. Həkim-proktoloq anus dərisindəki virus mənşəli itiuclu kondilomaları aradan qaldırır, iltihabi fistula və anomal yolları kəsir, travmaları müalicə edir, anal dəlikdən qanaxmanı dayandırır.

Proktoloqun müalicə etdiyi geniş yayılan xəstəliklərdən biri hemoroiddir. Bu xəstəlik düz bağırsağın varikoz genişlənməsi səbəbindən baş verir və anusdan çıxan hemoroidlərin inkişafına gətirib çıxarır, narahatlıq, qanaxma və ağrıya səbəb olur.

Proktoloq anus çatları, poliplər, paraproktit kimi xəstəlikləri müayinə və müalicə edir.

Qəbul zamanı anamnez toplandıqdan sonra həkim-proktoloq pasientin xarici baxış, perianal sahənin palpasiyasını və düz bağırsağın barmaq ilə müayinəsini daxil edən ilkin konsultasiyanı keçirir. Həmçinin, tibbi göstərişlərə əsasən rektoromanoskopiya, anoskopiya yaxud kolonoskopiya təyin edilə bilər.