İnsan həyatı boyu mikroblarla mübarizə aparır və çalışır ki, onlara qarşı immunitet yaratsın. Törədicilərə qarşı immun hüceyrələrin formalaşması ən çox uşaq yaşlarında olur.
Aztibb.az xəbər verir ki, pediatr Xanım Əhmədovanın sözlərinə görə, bu haqda çox danışılsa da son günlər uşaqlar arasında yayılan yuxarı tənəffüs yolları virus infeksiyaları zamanı anaların çox yanlışları ilə rastlaşırıq ki, bu da təbii yolla immunitetin formalaşmasına bir növ mane olur, xəstəliyin sağalma dövrünü uzadır.
Bəs bu yanlışlar nələrdir?
Yüksək hərarətin düzgün idarə olunmaması: 37-37.5°C hərarətin dərmanlarla salmağa çalışmaq, əslində icazə vermək lazımdır ki, orqanizm mübarizə aparsın 38-38.5°C -dən tez müdaxilə etməmək lazımdır.
Göstəriş olmadığı halda antibiotik müalicəsinə başlamaq, əslində antibiotikin virus mənşəli xəstəliklərdə müalicəvi effekti yoxdur.
Yerli-yersiz venadaxili infuziyalar, əslində oral rehidratasiyaya üstünlük verilməlidir.
Uşağı iştahı olmadığı halda məcbur yedirməyə çalışmaq, əslində bol vitaminli toyuq şorbası və meyvə-tərəvəzlə qidalandırmaq daha məqsədəuyğundur. Bunlardan başqa uşağın olduğu otağın havasını tez-tez dəyişmək, burun tənəffüsünün rahat olmasını təmin etmək lazımdır.
3 gündən artıq davam edən qısa aralıqla qalxan yüksək hərarət zamanı pediatr baxışı məsləhətdir.