Yay aylarında qida zəhərlənməsi və bağırsaq infeksiyalarının riski artır. İsti havalarda bakteriya, virus və parazitlər daha sürətlə çoxalır. Açıq havada uzun müddət saxlanılan və ya düzgün şəraitdə qorunmayan qidalar sağlamlıq üçün ciddi təhlükə yarada bilər.

Aztibb.az xəbər verir ki, aparılan tədqiqatlara görə, xüsusilə ət, toyuq, balıq, süd məhsulları və bişmiş yeməklərin soyuq şəraitdə saxlanılması vacibdir. Bu qidalar istidə bir neçə saat qaldıqda, görünüşü və qoxusu dəyişməsə belə, təhlükəli bakteriyalarla çirklənə bilər.

Bağırsaq infeksiyalarının əsas əlamətləri qarın ağrısı, ishal və qusmadır. Qida zəhərlənməsində isə əksər hallarda əvvəl qusma, sonra ishal müşahidə olunur. Uşaqlar, yaşlılar, şəkərli diabet, böyrək və ürək xəstəliyi olan şəxslərdə xəstəlik daha ağır keçə bilər.

Mütəxəssislər xəbərdarlıq edirlər ki, ishal zamanı həkim məsləhəti olmadan antibiotik qəbul etmək düzgün deyil. Müalicədə əsas məqsəd itirilən maye və elektrolitlərin bərpasıdır. Həmçinin uşaqlara ishal zamanı qazlı içkilər və hazır meyvə şirələri vermək tövsiyə edilmir.

Qida mənşəli infeksiyalardan qorunmaq üçün əllərin yeməkdən əvvəl və tualetdən sonra ən azı 20 saniyə sabunla yuyulması, qidaların düzgün saxlanılması və hovuz suyunun udulmaması tövsiyə olunur. İshalı olan uşaqların isə infeksiyanın yayılmaması üçün hovuza buraxılmaması məsləhətdir.