Yay aylarında hovuzdan sonra qulaq infeksiyalarına yoluxma halları artır.

Aztibb.az xəbər verir ki, mütəxəssislərin araşdırmalarına görə, bunun əsas səbəbi hovuzun çirkli olması deyil, sudakı xlor və digər kimyəvi maddələrin qulaq kanalının təbii qoruyucu balansını pozması, həmçinin qulaqda qalan nəmin bakteriya və göbələklərin çoxalması üçün əlverişli mühit yaratmasıdır.

Qulaqda qaşınma, dolğunluq hissi, ağrı və axıntı infeksiyanın ilk əlamətləri sayılır. Müalicə gecikərsə, qulaq kanalında daralma yarana və tibbi müdaxilə tələb oluna bilər.

Riski azaltmaq üçün hovuzdan sonra başı yana əyərək qulaqdakı suyu çıxarmaq, daha sonra isə fenlə aşağı temperaturda və 25-30 sm məsafədən qulaq nahiyəsini qurutmaq tövsiyə olunur.

Mütəxəssislər qulaq təmizləmək üçün pambıqlı çubuqlardan istifadəni də məsləhət görmür. Çünki bu vasitələr qulaq kanalının təbii qoruyucu təbəqəsini zədələyərək infeksiya riskini artırır.

Qulaq pərdəsində deşik olan və ya qulaq borucuğu taxılan şəxslərin isə hovuz və ya dənizə girərkən silikon qulaq tıxaclarından istifadə etməsi, qulağa su düşməsinin qarşısını alması tövsiyə edilir.